قصيدة(رسالة شهيد)لشهداء25 يناير........رائعة.........

بابا هات لي معاك حلاوه
كلمة قالتها حبيبتي
وانتو عارفين أد إيه الحب بين بنت وأبوها
واما تبقى آخر العنقود كمان بتزيد غلاوة
قلت حاضر بعد بوسة تدوب الصخر العنيد
وابتديت امشي ولمسة فوق خدودي
من إديها أحلى إيد
وابتدى يرن ف وداني صوت سؤالها
يعني إيه يا بابا حد يموت شهيد ؟
وانطلقت على الميدان
لما قالوا حي ع التحرير
عِلي صوت الأذان
بس وانا في القطر ما نسيتش الحلاوة
اشتريتها من عجوز عاجز بيسعى
لجل ياكل لقمته
زاد كسوفي من نشاطه وهمته
كان شعار للشقيانين
اللي موالهم حزين
قلت علشانكم هعيش للثورة لو دامت سنين
المهم أخدتها من إيده
وف جيبي الشمال
علشان تدفي القلب دايماً عنتها
واما رحت لمدخل المتحف لقيت أحلى شباب
"ورد مصر اللي مفتح في الجناين "
كحل ف عيون الشريف
رمل في عيون اللي خاين
فتشوني بكل رقة وإنسانية
كان معاهم شيخ من الأزهر ندهلي بذوق وقاللي :
اوعى تنسى ان العمل يلزم له نيه
من ساعتها ف كل خطوة رحت أجدد نيتي
واما جه وقت الحراسة وقفت اسبح ربنا
واحرس خواتي
والخطر بيحاصر العزَّل يوماتي
كنت واقف صدري عاري
والسلاح ف إدين ضواري
جت رصاصة
نفدت قلبي على جيبي الشمال
لون الدم الحلاوة
وجنبها صور العيال
وانتقلت لكون عجيب
ما يكفهوش مليون قلم يوصف جماله
قلت يا ريت أرجع آخد ميت رصاصة
حتى لو مدفع بحاله
هو ده طعم الحياة
انك تموت في الحق
متلفح بشاله
يا للي سامعين قولو للحلوة حبيبتي
بابا ما نسيش الحلاوة
بابا في الجنة ونعيمها
والملايكة قابلته بحب وحفاوة
بابا مستنيكي انتي
تعبري الدنيا وتيجي
يا للي جوه القلب عشتي
هيلاقيكي بحضن دافي
يروي شوقه
مهما غبتي